FORCA e ka një ndër prioritetet e saj thelbësore ngritjen e nivelit të decentralizimit dhe konsolidimin e vet-administrimit lokal të Komunës së Ulqinit. Me marrjen në dorë të administrimit të Komunës së Ulqinit, FORCA do të vazhdojë të:
- Vendosë në funksion të plotë ingerencat ekzistuese të Komunës së Ulqinit;
- Shfrytëzojë deri në maksimum hapësirën ligjore ekzistuese në Mal të Zi për të siguruar sa më shumë vet-administrim të Komunës së Ulqinit;
- Përqendrojë energjitë e saja për të eliminuar diskriminimin që i bëhet Komunës së Ulqinit lidhur me kompetencat, autoritetin e saj dhe investimet;
- Mundësojë zgjerimin e kompetencave administrative dhe fiskale të Komunës së Ulqinit.
Për të realizuar këto objektiva, FORCA do ta transformojë administrimin e Komunës së Ulqinit në një shembull të mirë në gjithë Malin e Zi në mënyrë që kjo komunë të fitojë më shumë besim për ta merituar dhënien e më shumë kompetencave. FORCA ka për të shfrytëzuar mbrojtjen ndërkombëtare ligjore për të drejtat e pakicave për të mundësuar zgjerimin, avancimin dhe forcimin e ingerencave lokale të Komunës së Ulqinit. Ajo gjithashtu ka për të lobuar tek qeveria e Malit të Zi, si dhe tek aktorët ndërkombëtarë për të mundësuar synimet e sipërpërmendura. Disa prej institucioneve ndërkombëtare të cilave do iu drejtohet FORCA për mbështetje lidhur me garantimin e maksimumit të vet-administrimit lokal në Komunën e Ulqinit janë:
- Kongresi i Autoriteteve Lokale dhe Rajonale të Evropës (Congress of Local and Regional Authorities) pranë Këshillit të Evropës, si dhe përmbushja e Kartës Evropiane e Vet- Administrimit Lokal (European Charter of Local Self-Government);
- Bashkimi Evropian, lidhur me kushtet e integrimit evropian të Malit të Zi që kanë të bëjnë me qeverisjen vendore dhe nivelin e decentralizimit;
- Komiteti Këshillimor i Kombeve të Bashkuara për Autoritetet Lokale (United Nations Advisory Committee of Local Authorities).
